Sri Garuda Dandakam – श्री गरुड दण्डकम्

29
Garuda-Dandakam-Shri-Garuthmantha-Dandakam

Sri Garuda Dandakam – श्री गरुड दण्डकम्

श्रीमान् वेङ्कटनाथार्यः कवितार्किककेसरी ।
वेदान्तचार्यवर्यो मे सन्निधत्तां सदाहृदि ॥

नमः पन्नगनद्धाय वैकुण्ठवशवर्तिने ।
श्रुतिसिन्धुसुधोत्पादमन्दराय गरुत्मते ॥

गरुडमखिल वेद नीडाधिरूढं द्विषत् पीडनोत् कण्ठिताकुण्ठ वैकुण्ठ पीठीकृत
स्कन्धमीडे स्वनीडागति प्रीत रुद्रा सुकीर्ति-स्तनाभोग गाढोप गूढ स्फुरत्कण्टकव्रात वेधव्यथा वेपमान द्विजिह्वाधिपाकल्प विष्फार्यमाण स्फटा वाटिका रत्न रोचिश्छटा राजिनीराजितं कान्ति कल्लोलिनी राजितम् ॥ १ ॥

जय गरुड सुपर्ण दर्वीकराहार देवाधिपाहार हारिन्
दिवौकस्पति क्षिप्त दंभोळि धारा किणाकल्प कल्पान्त वातूल कल्पोदयानल्प
वीरायितोद्यच्चमत्कार दैत्यारिजैत्र ध्वजारोह निर्धारितोत्कर्ष
संकर्षणात्मन् गरुत्मन् मरुत्पञ्चकाधीश सत्यादिमूर्ते न कश्चित्
समस्ते नमस्ते पुनस्ते नमः ॥ २ ॥

नम इदमजहत् सपर्याय पर्याय निर्यात पक्षानिलास्फालनोद्वेल पाथोधि
वीचीचपेटाहतागाध पाताळ भाङ्कार संक्रुद्ध नागेन्द्र पीडासृणीभाव भास्वन्नखश्रेणये चण्डतुण्डाय नृत्यद्भुजङ्गभ्रुवे वज्रिणे दंष्ट्रया तुभ्यमध्यात्मविद्या विधेया विधेया भवद्दास्यमापादयेथा दयेथाश्च मे ॥ ३ ॥

मनुरनुगत पक्षिवक्त्र स्फुरत्तारकस्तावकश्चित्रभानु प्रिया शेखरस्त्रायतां
नस्त्रिवर्गापवर्ग प्रसूतिः परव्यो मधामन् वलद्वेषिदर्पज्वलद्वालखिल्य प्रतिज्ञावतीर्ण स्थिरां तत्त्वबुद्धिं परां भक्तिधेनुं जगन्मूलकन्दे मुकुन्दे महानन्ददोग्ध्रीं दधीथा मुधाकामहीनामहीनामहीनान्तक ॥ ४ ॥

षट्त्रिंशद्गणचरणो नर परिपाटी नवीन गुंभगणः ।
विष्णुरथ दण्डकोऽयं विघटयतु विपक्ष वाहिनी व्यूहम् ॥

विचित्र सिद्धिदः सोऽयं वेङ्कटेशविपश्चिता ।
गरुडध्वजतोषाय गीतो गरुडदण्डकः ॥

कवितार्किक सिंहाय कळ्याण गुणशालिने ।
श्रीमते वेङ्कटेशाय वेदान्त गुरवे नमः ॥

श्रीमते निगमान्तमहादेशिकाय नमः ॥

LEAVE A REPLY

Please enter your comment!
Please enter your name here